Exo 14 | PMA | STEP |

Exodus 14

Ahi Sakin Me-Isrel Keil Aka Pas Atas Hilhili en Atan Tames

Eksodas 14:5-31

5 Navong asuv houlu ten out Isip raengoni keke me-Isrel keil uvaha tuai, kei ral min hetetamen onen keil, rendemien one viles ka avit, “?Asanei ke romul romumoni? !Romaen me-Isrel keil alohosai ranir, ka keil irmumontei mun umen keil orer!” 6 Sakini asuv houlu vita ka vis meatin tavaeen keil onen isak mesen keil ka hos esen keke heleh kat tavaeen onen. 7 Asak mesen keil evus, asuv houlu muloh en kat onen ka rie lat more kat tavaeen sav keil heite handred ahetai (600) koa hos mul lehei keke avat tavaeen keil onen akilea avaloh eni. Ka hetetamen tavaeen sav keil emun onen akur kat teisav keil ka amusil keil. 8 Iahova sakin rendemien onen asuv houlu keih tamun keke valikat me-Isrel keil. Ka navong asuv houlu ka meatin keil onen amul umai, me-Isrel keil areingeingeni. Amual amarir ka rendemien konakon tovuol emun en keil. 9 Ka meatin keil tavaeen ten out Isip amuloh akatau usil keil: koakeil koa amuloh en kat tavaeen, koa mun amuloh en hos, ka koakeil emun amual enges. Avotin me-Isrel keil esuk navong keil amul amuseh en vali Atas Hilhili, vesesal en taon elu koa avise keilu en Vi-Hahirot ka Baal-Sevon.

10 Navong me-Isrel keil ales asuv houlu ka meatin tavaeen onen keil umai, keil ametau vis ametau ka amurang vina min Iahova ven kataunien. 11 Keil aviles ka aviteni min Mosis avit, “?Koles asa koa komumoni navong kolah lat komai ran out Isip? ?Out tatetahinien rovinvintei en out Isip keke sakin keik kolah lat komai memai en out volvol ekek mevamatmat? 12 Koanik suval tounah koa meviteni minuk hemai hekistal. Navong romul veah en out Isip, meviteni minuk mevit kovasokovein komai mevales mevahi slev onen me-Isip keil. Hetahos imok keke mehehi slev keil keva, heloh lin koa mehematmat en out volvol ekek.”

13 Ka Mosis viteni min keil vit, “!Minametautei! Mehelomal hekeih ka miheles asa koa Iahova houmoni ven kami kosa. Me-Isip keil enek, miherlestei mun keil. 14 Iahova keinges hehu en usite onami, ka kami mihermumon etai tounah.”

15 Iahova viteni min Mosis vit, “?Vensa komul korangis kataunien venau? Hiteni min me-Isrel keil avamea avasak mesen keil avaha. 16 Kihat lat eisal onom ka kihuli kati hehina nesa en atas. Hesakin atas heleh vasi helu, ka meatin keil akilea avoual koteh atas en atan tames. 17 Inau numon rendemien onen me-Isip keil hekeih keke avakatau usil kami. Nihat lat isom heloh lin isen asuv houlu ten out Isip navong nilin kei hetal min meatin tavaeen onen keil: koakeil amuloh en kat one, koakeil amuloh en hos, ka koakeil emun amual enges. 18 Navong nilin keil, me-Isip vasi keil ilea suk keke inau navi Iahova.”

19 Angelo tai onen Ahi koa mul mulamun meatin keil tavaeen onen me-Isrel keil en ualien one, kei viles va en eisile keke vating koe keil. Ka mahmah onen Ahi emun musili, 20 mul vas me-Isrel keil ka me-Isip keil. Mahmah enek san mankoli min me-Isip keil, ka en usite onen me-Isrel keil, san meneai min keil. Sakini en vongien enek, keil asakras avamai vesesal ven me-Isrel keil.

21 En vongien enek, Mosis mutea lat eisal onen nesa en atas, ka Iahova sakin mari eang tai ka en out ist, mai muh vas atas. Ka navong me-Isrel keil alele, alesi keke atas leh vasi tuai, out luhu mai vi atan tames. 22 Atas vi vieh en usite keilu, ka en vongien enek, me-Isrel keil amual kotehei en atan tames enges. 23 Navong me-Isip keil alei kilea keke me-Isrel keil amul uva, keil amuloh alikat keil en out tames en atas enek: koakeil en kat one, koakeil en hos keil, ka koakeil emun amual enges. 24 Vesesal out valan, Ahi mules en ahang koa taveah vina nesa ka les meatin tavaeen keil ten out Isip. Evus, mumon keil alei konakon ka arendem konakon. 25 Ahi mumon wil ten kat one averai, asakras avakarali revi. Sakini me-Isip keil avit, “!Rovahaha ran me-Isrel keil ven Iahova mul vuhu en usite one!”

26 Iahova viteni min Mosis vit, “Kitea lat hem heha nesa en atas, ka hemai suk hemavul koe me-Isip keil ral min hos ka kat keil one.” 27 Sakini, navong meteiai roha, Mosis mutea lat hen ka atas mai ris en vulin. Me-Isip keil asak somok avamea, ka Iahova sakin atas rein keil vasi uva en huinev. 28 Atas muris mai, mutaluh koe vasin meatin tavaeen keil ten out Isip ral min hos keil ka kat keil one koa amusil me-Isrel keil uva en atas. Tovuol en keil vamoul. 29 Ka me-Isrel keil, keil amual koteh atas en atan tames, atas vi vieh en usite vasi keilu.

30 En avong enek, Iahova lah lat me-Isrel keil ran hen me-Isip keil, ka ales teiai keil one umatmat amul en vali atas. 31 Navong me-Isrel keil ales mari keihoen koa Iahova rie lati navong mu vini me-Isip keil, ametauni ka avouhou mariso veni. Keil aling demkatien one eni ka en Mosis koa vi meatin toumien onen.